Azərbaycan Respublikasının texniki ali təhsil sisteminin aparıcı təhsil ocağı - Azərbaycan Dövlət Neft Akademiyasının (ADNA) 80 illik yubileyi qeyd olunur.
1920-ci ildə Bakıda fəaliyyət göstərən texniki məktəbin əsasında Avropa və Asiyada neft-qaz və kimya texnologiyası sənaye sahələrində ilk ali təhsilli mütəxəssis hazırlığına başlayan indiki ADNA 80 il ərzində dünyanın qabaqcıl ali texniki məktəbləri səviyyəsinədək inkişaf yolu keçmişdir.
Az saylı ixtisaslar üzrə mütəxəssis hazırlığı ilə bağlı tədris prosesinin təşkili və idarə olunması əsas e'tibarı ilə Rusiyanın ayrı-ayrı şəhərlərindən dəvət olunmuş alim, pedaqoq və mütəxəssislərin köməyi ilə aparılan bu tədris ocağı hal-hazırda 24 istiqamət üzrə bakalavr, magistr pillələrində, elmi kadrların hazırlanmasında 100-dən çox elmlər doktoru, professorlar, 700-ə yaxın elmlər namizədi, dosentlər, 62 kafedra 18 problem elmi tədqiqat laboratoriyaları, 2 elmi-tədqiqat və sənaye müəssisələri işçilərinin ixtisasının artırılma və yenidənhazırlama institutları, böyük maddi-texniki və təcrübə bazasına malik yanacaq-enerji və kimya kompleksi sahələri üzrə mütəxəssis hazırlayan ali texniki mərkəzinə çevrilmişdir.
Sizi bu ali təhsil-elm ocağı ilə tanış etməklə gələcək qarşılıqlı əməkdaşlığımıza böyük ümid bəsləyirəm.

    Rektor, professor S.F.Qarayev